صداع_الصباح
ناس كتير سألت عن سبب الصداع اللي بيجي الصبح أول ما تصحى من النوم ويختفي مع الوقت
كتبت وفاء سليمان محمد
صداع_الصباح ناس كتير
ومنها اللي بسبب عادة سيئة انت ماشي عليها ..
(لأ مش العادة دي .. عادات تانية .. كتير )
وعشان نفرق الاتنين من بعض ركز معايا
بالنسبة للأسباب المتعلقة بعاداتك السيئة:
أول حاجه هي (الجفاف) :
انك تبقا طول اليوم عطشان وشربك للمية قليل
وتيجي بقا تزود ساعات النوم على عدد الساعات اللي ما بتشربش فيها ..
فطبيعي جسمك هيحصل له جفاف .. حتى ولو بسيط بس اسمه جفاف ..
ودا من اسباب صداع الصباح
فبالتالي .. لازم تشرب مية كتير خلال يومك
عشان ما يجيلكش جفاف وما تصدعش
تاني حاجه هي (عادات النوم السيئة) :
1- زي ان الوسادة تبقا وحشة ومش مريحة يعني عالية اوي او واطية اوي ..
فتصحى الصبح عضلات رقبتك متنشنة وتعملك الصداع دا ..
فياريت تختار وسادة مريحة تنام عليها (الوسادة العالية .. صدعتني يا غالية )
2- وزي بردوا الجز على السنان وانت نايم ..
ساعات ممكن تلاقي نفسك بتجز على اسنانك وانت نايم ..
كأن النوم مستخبي في بقك وخايف يهرب
ودا بيخلي عضلات الوش والبؤ تتنشن ولما تصحا من النوم تعمل صداع
فبالتالي حاول ما تخرجش رياض المنفلوطي اللي جواك وقت النوم
تقمص شخصية الخليل كوميدي وانت هترتاح
يعني قبل ما تنام قول (تن تررارن تنتن) عشر مرات وانت هتفك كدا وتبقا فل
3- ولو نومك قليل .. وبالذات لو أقل من 4 ساعات في الليلة
حتى لو كنت نايم بالطرق الصحيحة ومش عامل أي حاجة من اللي فوق بردوا هتصدع
فنام وقت كافي عشان تعرف تعيش يومك صح .. الدنيا مش هتطير .. صحتك أهم
4- ولو نايم في مكان التهوية بتاعته مش كويسه .. فالأكسجين قليل
فالمخ يتحرم منه .. فتصحا مصدع .. فأنت ممكن تفتح الشباك وانت نايم
وانت هتلاقي الصداع راح .. والتلفزيون راح .. والتلاجة راحت .. وكله راح
تالت حاجه في أسباب صداع الصباح هي (الحمل) :
طبعا الحامل الدورة الدموية عندها نشطة جدا .. لأن فيه بني أدم بيتخلق جواها
وحجم الدم بيزيد ودا بيسبب صداع .. وبرغم كدا الموضوع دا ما بيسببش لوحده صداع الصباح .. بس لو فيه صداع هو بيخليه قوي اوي .. اوي اوي
رابع حاجه هي (الانسحاب من الكافيين او الكحول) :
1- ونبدأ بالكافيين : عشان دا الشائع عند المسلمين .. الواحد بيبقا طول اليوم مقضيها شاي وقهوة وبيبسي ونسكافيه .. شاي وقهوة وبيبسي ونسكافيه .. شــ…. وهكذا
من غير فواصل ولو فيه فاصل بين كل كباية والتانية ممكن ساعة او ساعتين
فالمخ خلاص اتعود على كدا .. فلما تنام وتحرمه من الكافيين لمدة النوم دي كلها
أكيد هتصدع .. فحاول تقلل من شربك للحاجات دي شوية عشان مخك ما يتعودش عليها
2- الكحول : كلنا شفناها في المسلسلات والأفلام الحركة دي
واحد قاعد في الخمارة وسكران طينة وعمال يقول أنا جدع .. ويروح يترمي ع السرير وينام في ثانية .. وأول ما يصحا الصبح يقولك دماغي هتتفرتك من الصداع .. ليه بقا ؟!
الكحول له تأثيرين مهمين جدا في جسمك وهما :
– انه بيزود ادرار البول وبالتالي ممكن يؤدي للجفاف
– وانه بيوسع الشرايين اللي في جسمك ودا لوحده بيعمل صداع
خامس حاجة (أدوية الصداع نفسها) :
لما تكون بتستخدمها بغباء وعودت جسمك عليها أول ما تأثيرها يروح على طول الصداع يرد تاني أعنف من الأول ..
